楊千嬅聲稱唔介意被同鄭秀文撞樣 網民:語氣表情出賣咗佢啦!

604

最近在網上瘋傳一張女明星在深水埗某商場的舊照,相中的女星染咗一頭酒紅髮色﹑戴上黑框眼鏡﹑皮膚白晳、仲搽咗鮮紅唇膏,加上穿藍色花花恤衫,一身造型唔止令網民熱議,話分唔到相中人係鄭秀文(Sammi)定楊千嬅,甚至有人話似李香琴、梅小慧、李蕙敏等,超搞笑。事後Sammi「自首」話相中人係佢,而楊千嬅昨日出席活動也回應此事,但有網民睇咗千嬅回應寸到爆,而且就話佢把口話唔介意,但佢嘅語氣同表情都徹底將佢出賣!

楊千嬅、鄭秀文撞樣 網民傻傻分不清

有網民在深水埗西九龍中心行街時,望到牆身貼滿各大明星出席商場活動時的陳年照,佢話相中人疑似楊千嬅又似鄭秀文,於是同朋友打賭仲放上網一齊研究:「我今日去西九龍中心行街, 見到楊千樺呢張相, 然後我個朋友死都話佢係鄭秀文, 大家麻煩用雪亮嘅眼睛睇清楚,然後留言佢係邊個。 因為我哋打賭咗100蚊。」其實楊千嬅初出道已被指佢個樣好似鄭秀文,呢張相更加證明佢哋似,仲有網民搞笑話似李香琴、梅小惠。

 

Sammi自嘲有「咸濕伯父」feel

見到大家為了自己的舊照討論得咁激烈,Sammi喺IG自首,佢寫道:「這個是mi呀。Mi估計自己拍這張照片前一晚,大概是狂飲了十碗超級味精麻辣火煱湯,另加七包薯片然後再鯨呑了一枝粗鹽, 面型就會有如此『十級飽滿』的效果。 簡直不是蘋果肌咁簡單,是史上第一種西瓜肌。至於那副眼鏡,下次麻煩攝影大哥提醒mi 托高小小,現在看來壓住眼皮兼且不上不下,有點 『咸濕伯父』feel。」

粉底白過麵粉

Sammi續寫:「至於紅唇嘛!有圖有根據,mi確實一直是『紅唇烈豓(燄)』的鐵粉,所以今時今日做運動爆汗都會繼續紅唇烈豓(燄)極待撫慰……過去的由它過去吧我要向要看,因有自信所以美麗的重要性,我仍然能夠講一聲我係我。但mi將要開演唱會,求求不要再用舊照刺激我啦,這個粉底白過麵粉是甚麼玩法,至於老zing畫的塘虱眉就會一直挺下去永遠不厭棄。」

最啜核仲係有網民搵到當年阿Mi出席該商場嘅活動,鄭秀文同葉蒨文為商場任剪綵嘉賓,當年鄭秀文染了一頭紫紅色去拍攝國語專輯《為你等》的唱片封面以及《癡癡為你等》的MV。

郭富城、楊千嬅昨日出席一個環保活動,會後佢接受TVB《娛樂頭條》訪問,主持林子博話:「近日有人喺商場見到有間舖頭有張明星相,大家就估緊⋯」都未等對方講完,千嬅就話:「啊⋯仲有人買明星相㗎依家?吖係呀!」林子博續說:「係呀!估緊究竟呢個係楊千嬅定鄭秀文⋯⋯」又未等對方講完千嬅又話:「嘩!咁呢件事好珍貴喎!」

 

「原來我值100蚊!OK!」

林子博話個網民跟住仲同朋友以100元輸賭,千嬅寸爆話:「吓100蚊咋?」之後千嬅低頭苦笑話:「值100蚊咋喎!原來我值100蚊!OK!原來咁⋯」子博補充話「唔係個網民輸賭啫!」千嬅就話:「哈哈哈⋯講笑啫!我又唔知有件咁嘅事喎!」

「分到咪得囉!」

子博話張相真係好難分辨,千嬅話:「係咩,咁唔緊要吖,依家分到咪得囉!」千嬅講到個「囉」字就拉長個尾音!佢又補充話:「係囉!不過有時係有機會認錯嘅!某啲角度我都覺得似,但係冇乜所謂吖!

「似著佢靚」

千嬅話:「咁人人都會有一個相似嘅地方嘅!咁我又覺得冇乜嘢喎,咁呀!似著佢靚我又覺得OK嘅~哈!」講完佢就「哈!」失笑咗一聲!有網民睇咗千嬅回應話佢根本一早知呢單嘢,扮到唔知情,回應時勁寸,雖然佢口口聲聲話唔介意,但語氣同表情都徹底將佢出賣!

大家聽聽千嬅點講: